Pianisti kinez ‘fyen’ Shtetet e Bashkuara

 



Pianisti kinez, Lang Lang, i njohur në të gjithë botën për talentin e tij, ka “ofenduar Shtetet e Bashkuara”.
Lajmi publikohet nga stacioni televiziv amerikan ABC, sipas të cilit gjatë mbrëmjes gala të organizuar nga presidenti Obama për nder të homologut të tij kinez, Hu Jintao, Lang Lang ka luajtur një pjesë muzikore kineze të njohur për notat e saj të forta nacionaliste anti-amerikane.

Pjesa e luajtur nga Lang Lang, sipas ABC është kolona zanore e filmit kinez “Mëmëdheu” ku tregohet jeta e një ushtari kinez që gjatë luftës së Koresë mund një ushtar amerikan.

Prokuroria, kërkesë për asistencë SHBA-ve

 









Prokurorja e përgjithshme Ina Rama ka njoftuar në një konferencë për shtyp se institucioni që ajo drejton i ka dërguar një kërkesë zyrtare ambasadës amerikane në Tiranë, për të dhënë asistencë teknike në lidhje me hetimin e ngjarjeve të 21 janarit.

Kryeprokurorja, në krahë të ambasadorit amerikan, Arvizu, ka theksuar se do t’i shkojë hetimit deri në fund me ndihmën e SHBA-ve, në mënyrë që ky proçes të jetë sa më i plotë dhe i besueshëm.

“Jemi të ndërgjegjshëm se hetimi i këtyre ngjarjeve paraqet vështirësi për shkak të kompleksitetit të ngjarjes, për shkak të pëfshirjes së institucioneve shtetërore që kanë qenë me detyrë në mbrojtje të institucioneve, nevojës për të zbardhur ngjarjen dhe situatës politike. Duke ndjerë detyrimin ligjor dhe përgjegjësinë për mbarëvajtjen e hetimit, kërkoj mbështetjen e ambasadës amerikane në hetimin e kësaj çështjeje, në dhënien e një asistence teknike. Kjo ka të bëjë me disa aspekte që lidhen me proçedurat e hetimit. Kjo do të sjellë që hetimi të jetë më i arrirë dhe më i besueshëm”, tha Rama.

“Kemi angazhuar të gjithë trupën e prokurorëve të rrethit gjyqësor Tiranë që kanë kryer me shumë përgjegjësi dhe përkushtim mbledhjen e të dhënave të para, pas ndodhjes së ngjarjes. Këto të dhëna janë të nevojshme t’i nënshtrohen një sërë ekzaminimesh, konkluzionet e të cilave janë shumë të rëndësishme për nxjerrjen e një hetimi të pavarur dhe të gjithanshëm, ndihma do të garantojë një standard të madh në besueshmërinë e saj”, deklaroi ajo.

Duke folur për urdhër-ndalimet ndaj efektivëve të Gardës së Republikës, prokurorja e përgjithshme ka deklaruar se ekzekutimi i tyre do të jepte më shumë detaje për zbardhjen e çështjes dhe do e bënte më të lehtë vijimin e hetimit.

“Nëse urdhër-ndalimet do të ishin ekzekutuar do të kishim pasur më shumë të dhëna për hetimin”, theksoi Rama.

“Është folur për fletë-arreste, por janë urdhëra-ndalimi të cilat lëshohen për personat e dyshuar për një vepër. Kemi pasur dyshime se këta persona kanë qenë të përfshirë në ngjarjet e të premtes. Është gjithçka për t’u verifikuar më tej dhe vetë pjesa e ekzekutimit të ndalimeve do na ndihmonte në zbardhjen e çështjes”, tha kryeoprokurorja.

“Në lëshimin e urdhërave të ndalimit kemi pasur në konsideratë edhe nenin 254 që është përfolur si një nen që na pengon në lëshimin e urdhër-ndalimeve”, sqaroi ajo.

Ndërkohë në fjalën e tij ambasadori amerikan deklaroi se do të marrë në shqyrtim kërkesën, për të cilën është shprehur optimist se do të përmbushet në të gjitha pikat e saj.

“Sipas ligjit shqiptar, zyra e Prokurorisë merret me hetimin e këtyre ngjarjeve dhe ne shprehim mbështetjen e SHBA-ve për këtë zyrë. Do ta shqyrtoj me shumë kujdes kërkesën drejtuar mua dhe do ta dërgoj në Uashington, megjithatë mendoj se përgjigjja do të jetë në favor dhe pozitive. Shumë shqiptarë, përfshirë kryeministrin e vendit, të gjithë kanë kërkuar ndihmën ndërkombëtare për hetimin e këtyre ngjarjeve. Nëse Prokuroria e Përgjithshme e sheh të nevojshme se SHBA-të mund të ofrojnë ndihmën e tyre, unë ndihem i detyruar që kjo të përmbushet”, tha Arvizu.

Ai kërkoi nga dy liderët politikë në vend, kryeministrit Berisha dhe kreut të PS-së Rama, që të shtyjnë ose anulojnë tubimet e parashikuara ditën e premte dhe të shtunë.

“Unë shpresoj që kryeministri i vendit dhe udhëheqësi i opozitës të marrin në konsideratë shtyrjen ose anulimin e tubimeve që janë anonçuar të premten dhe të shtunën”, theksoi diplomati amerikan.

Mosarrestimi i gardistëve, juristët: Precedencë e rrezikshme

 

Për juristen Vjollca Meçaj, ish-anëtare në Gjykatën e Larte e tashmë drejtuese e Komitetit Shqiptar të Helsinkit, refuzimi i policisë për të ekzekutuar urdhër-arrestet e prokurorisë shënon nisjen e një precedence të rrezikshme, por që sipas saj, për prokurorët ka një zgjidhje e cila është gjykata.
“Nëse do të shprehet gjykata cështjat do të jetë e zgjidhur dhe nuk do të ketë më refuzim, të jeni të sigurt. Zgjidhja është gjykata. Policia duhet të zbatojë të gjitha urdhërat që jep prokurori sepse është ai autoriteti që zhvillon ndjekjen penale. Organet kanë lirinë të kryejnë disa veprime paraprake të cilat kontrollohen nga prokurori, anulohen nga prokurori dhe në të njëjtën kohë prokurori i orienton dhe i urdhëron ata të bëjnë disa veprime të tjera proceduriale. Ata janë të detyruar t’i bëjnë, ky është ligji, kjo është Kushtetuta, ky është rregulli. Se kush është përgjegjës në këtë mosbindje, unë shpresoj shumë që ta gjejë prokurori e t’i shkojnë gjesë deri në fund sepse është e rëndë që të krijohet një precedencë e tillë brenda një shteti demokratik”, tha juristja Mecaj.

Zonja Meçaj thekson se prokurorët nuk duhet të dorëzohen dhe të hetojnë paralelisht jo vetëm ngjarjen por edhe njerëzit në polici që nuk zbatojnë ligjin në këtë rast.

“Shpresoj që prokuroria t’i shkojë gjërave deri në fund, sepse në të kundërt do të krijojmë precedentë ku në këtë shtet nuk do ta marrë vesh i pari të dytin. Prokuroria duke ndërtuar hetimin, duke kryer veprimet e nevojshme proceduriale në këtë drejtim, nuk duhet të heqë dorë edhe nga mbajtja e një qendrimi, këshillimi për ata oficerë të policisë që nuk zbatojnë urdhër-arrestet”, sqaron zonja Meçaj.

Real Madrid mban hapin e Barçës

 
Me një gol të Karim Benzema në minutën e 61-të Real Madrid mund Mallorca në Santiago Bernabeu në javën e 20-të të kampionatit spajnoll. Madrilenët vazhdojnë të qëndrojnë në vendin e dytë me katër pikë diferencë ndaj katalanasve të Barcelonës.

Në vend të tretë qëndron Villarreal, ekip i cili fitoi 2-1 ndaj Real Sociedad falë dy golave të Giuseppe Rossi.

Rezultatet e tjera të ndeshjeve të djeshme janë: Getafe-Espanyol 1-3, Sporting Gijon-Atletico Madrid 1-0, Real Zaragoza-Deportivo la Coruna 1-0, Almeria-Osasuna 3-2.

Sot do të mbyllet java e 20-të e ligës spanjolle me ndeshjen Athletic Bilbao-Hercules.

Milan mund Cesena 2-0

 

Një autogol i mbrojtësit të Cesenës dhe një gol në fund të ndeshjes nga Zlatan Ibrahimoviç i kanë dhënë fitoren 2-0 Milanit në ndeshjen e fundit të javës së 21-të të Serisë A. Me këtë fitore Milani mban vendin e parë me 4 pikë diferencë ndaj Napolit të vendit të dytë.

Milan ka vuajtur ndaj Cesenës për shkak të dy dëmtimeve: Gattuso dëmtohet në nxemjen përpara ndeshjes dhe Nesta dëmtohet sërish në shpatullën e majtë, ajo që i ka dhënë probleme për tre vite rresht.

Demonstrata ne Shqiperi, fokusohen vrasjet para kryeministrise

Terrori, policia rreh gazetarët

Një gazetar është plagosur në dorë me armë zjarri disa të tjerë janë rrahur barbarisht nga policia

Terrori i djeshëm në rrugët e Tiranës nuk ka kursyer as gazetarët. Dhuna e policisë ndaj punonjësve fillon nga goditjet me shkopinj gome dhe shkelma deri tek armët e zjarrit. Gazetarët nuk i ka mbrojtur ndaj dhunës shtazarake të forcave të policisë as dokumentet e identifikimit si dhe statusi i informuesit të publikut.


Ened Janina redaktor i sektorit të Politikës dhe Ekonomisë në gazetën "Shekulli" është qëlluar në mënyrë kafshërore nga policët të cilët pas shpërndarjes së turmës filluan të godasin personat që lëviznin të vetëm në rrugë.


Pasi i janë afruar policët ka kërkuar të mbrohet duke nxjerrë dokumentin e identifikimit shoqëruar edhe me togfjalëshin: "Jam gazetar, mos më godisni", por përveç goditjeve me shkopinj gome dhe qytë automatiku ka marrë këtë përgjigje nga policët: "Me plasi k... që je gazetar". Me situatë edhe më të rendë është përballur edhe gazetari i televizionit "ABC News", Fatos Mahmutaj, duke raportuar drejtpërdrejt nga sheshi duke u plagosur me plumb në dorë.


Burime nga prokuroria shprehen se pasi ka shpuar tejpërtej dorën e gazetarit, plumbi ka ndaluar në kokën e njërit prej protestuesve duke i shkaktuar atij vdekjen. Me shkopinj gome dhe shkelma është rrahur edhe një kolegu i tij, pjesë e stafit teknik të televizionit "ABC News".
Plagë ka marrë edhe gazetari i televizionit "Ora News" gjatë raportimit të drejtpërdrejtë që po bënte nga sheshi.

Pasi kanë shpërndarë turmën, policët janë hedhur në "sulm" ndaj qytetarëve dhe gazetarëve duke goditur në nofull gazetarin Elton Dono, gjë e cila i ka kushtuar dy të qepura. Nga ana tjetër, fotografi Feliks Bilani, është goditur në kokë me gurë nga turma. Ai gjithashtu raporton goditjen me gurë edhe të reporterit dhe kameramanit të Agjencisë Reuters.

Fajon: Dënoj dhunën ndajë njerëzve

 
Eurodeputetja Tanja Fajon reagon sërish për Shqipërinë, duke dënuar përdorimin e armëve ndaj njerëzve të paarmatosur dhe duke bërë thirrje autoriteteve në vend që të gjejnë personat përgjegjës që morrën jetën e tre qytetarëve të thjeshtë, siç shprehet ajo. “Mjaft kanë vuajtur njerëzit në Shqipëri. Unë u bëj thirrje të gjithë politikanëve të përgjegjshëm t'i japin fund kësaj ere të trishtueshme që po shtyn vendin drejt ngërçit, qorrsokakut dhe protestave politike të tejzgjatura. Të qëllosh me armë zjarri kundër qytetarëve të paarmatosur, në një lufte për pushtet, është e papranueshme e kjo duhet të marrë fund. Në çdo shoqëri, qytetarët kanë të drejtën të ngrihen për atë çfarë ata besojnë se është e drejtë dhe/ose për të treguar pakënaqësinë me situatën aktuale. Jam e bindur se dje, në 21 janar, njerëzit në Tiranë u mblodhën për të shprehur ndjenjën e tyre kundër kësaj situate në vend që po zgjat prej shumë kohësh. Unë dënoj fuqishëm çdo lloj dhune kundër njerëzve të zakonshëm në rrugë, ndërsa ata shprehin vullnetin e tyre. Vdekjet e njerëzve janë një humbje e madhe, për këtë arsye, është detyra jonë njerëzore që të tregojmë dhembshurinë tonë ndaj familjeve e miqve të tyre dhe ka rëndësi shumë të madhe që të gjenden përgjegjësit e këtyre vrasjeve”, është shprehur Fajon.

Eurodeputetja sllovene shpreh në komunikatën për shtyp dhe zhgënjimin e saj ndaj klasës politike shqiptare.

“Udhëheqësit politikë janë të pazotë të mblidhen bashkë për të zgjidhur problemet, duke lënë popullin pa asnjë alternativë, shpresë dhe progres. Politikanët nevojitet që të marrin përsipër përgjegjësitë për veprimet e tyre dhe të fillojnë të dëgjojnë zërin e qytetarëve të tyre. Të gjithë ju meritoni një vend funksional, të drejtë e të ndershëm, por mbi të gjitha ju meritoni paqe e stabilitet”, tha Fajon.

Pas atij të një ditë më parë, ky është reagimi i dytë i eurodeputetes Fajon, për situatën e krijuar gjatë ngjarjeve tragjike të 21 janarit në Shqipëri.

Rama, homazhe viktimave

 

24 orë pas demonstratës që përfundoi në mënyrë tragjike, drejtues të Partisë Socialiste ishin në bulevardin “Dëshmorët e kombit”, para selisë së Kryeministrisë, pikërisht në vendin ku ndodhen edhe vrasjet. (UPDATE)

Kryetari i Partisë Socialiste, Edi Rama deputetë të kësaj partie, por edhe drejtues të partive të tjera opozitare, pjesë e koalicionin opozitar në Shqipëri, vendosën buqeta me lule në bulevard dhe trotuarë në nderim të protestuesve që humbën jetën, tashmë të konfirmuar edhe zyrtarisht nga të shtënat e Gardës së Republikës.

Politikanëve të opozitës iu bashkuan edhe qytetarët e Tiranës.



Përcillet në banesën e fundit Hekuran Deda

Gjatë ditës së shtunë është kryer ceremonia mortore e 39-vjeçarit nga Dibra me banim në fshatin Laknas, në Tiranë.

Të afërm, miq dhe shokë kanë marrë pjesë në ceremoninë mortore të Hekuran Dedës, 39 vjeçarit që u vra me një plumb në kokë gjatë protestës së të premtes përpara Kryeministrisë.

Kortezhit të nisur nga banesa e tij në Laknas për në varrezat e fshatit domje, i janë bashkuar edhe 20 deputetë socialistë.

Riti fetar, traditë e familjes Deda, ka nisur ceremoninë e varrimit.

Më pas është kryer edhe ceremonia e varrimit.

Me lotë dhe hidhërim të afërmit e Hekuran Dedës e kanë përcjellë atë për në banesën e fundit, edhe pse pa prezencën e grave të familjes për shkak të traditës së tyre fetare.

Edhe kryetari i Partisë Socialiste, Edi Rama ka ngushëlluar të afërmit e Hekuran Dedës, protestuesit e vrarë përpara Kryeministrisë.

Nesër në Fier zhvillohet edhe ceremonia mortore e Faik Myrtës, një prej demostruesve që humbi jetën me armë zjarri.



Gjirokastër, përgatiten homazhet për Ziver Veizi

Qindra qytetarë kanë përcjellë për në fshatin e lindjes trupin e Ziver Veizit, 48 vjeçarit nga Gjirokastra.

Miq të Ziverit, njëkohësisht dëshmitarë në vendngjarje, kanë treguar momentin e vrasjes së tij, ndërkohë që familjarët e Veizit të revoltuar kërkojnë ndëshkimin e autorëve të vrasjes.

Ditën e dielë do të kryhen homazhe në nderim të të ndjerit Ziver Veizi në selin lokale të PS-së, e më pas do të kryhet ceremonia mortore në fshatin Zenelaj.

Dhunohet redaktori i Shekullit dhe kolegët

Terrori i djeshëm në rrugët e Tiranës nuk ka kursyer as gazetarët. Dhuna e policisë ndaj punonjësve fillon nga goditjet me shkopinj gome dhe shkelma deri tek armët e zjarrit. Gazetarët nuk i ka mbrojtur ndaj dhunës shtazarake të forcave të policisë as dokumentet e identifikimit si dhe statusi i informuesit të publikut. Ened Janina redaktor i sektorit të Politikës dhe Ekonomisë në gazetën "Shekulli" është qëlluar në mënyrë kafshërore nga policët të cilët pas shpërndarjes së turmës filluan të godasin personat që lëviznin të vetëm në rrugë. Pasi i janë afruar policët ka kërkuar të mbrohet duke nxjerrë dokumentin e identifikimit shoqëruar edhe me togfjalëshin: "Jam gazetar, mos më godisni", por përveç goditjeve me shkopinj gome dhe qytë automatiku ka marrë këtë përgjigje nga policët: "Me plasi k... që je gazetar". Me situatë edhe më të rendë është përballur edhe gazetari i televizionit "ABC News", Fatos Mahmutaj, duke raportuar drejtpërdrejt nga sheshi duke u plagosur me plumb në dorë. Burime nga prokuroria shprehen se pasi ka shpuar tejpërtej dorën e gazetarit, plumbi ka ndaluar në kokën e njërit prej protestuesve duke i shkaktuar atij vdekjen. Me shkopinj gome dhe shkelma është rrahur edhe një kolegu i tij, pjesë e stafit teknik të televizionit "ABC News". Plagë ka marrë edhe gazetari i televizionit "Ora News" gjatë raportimit të drejtpërdrejtë që po bënte nga sheshi. Pasi kanë shpërndarë turmën, policët janë hedhur në "sulm" ndaj qytetarëve dhe gazetarëve duke goditur në nofull gazetarin Elton Dono, gjë e cila i ka kushtuar dy të qepura. Nga ana tjetër, fotografi Feliks Bilani, është goditur në kokë me gurë nga turma. Ai gjithashtu raporton goditjen me gurë edhe të reporterit dhe kameramanit të Agjencisë Reuters.

KSHH: Tejkalimi i dhunës nga shteti, i papranueshëm

 

Komiteti Shqiptar i Helsinkit ka shprehur keqardhjen, dhimbjen dhe shqetësimin e tij që tubimi i djeshëm në Bulevardin Dëshmorët e Kombit përfundoi në një arenë të dhunshme midis forcave të policisë dhe demonstruesve.

Si pasojë u vranë tre persona dhe u plagosën një numër i madh, midis protestuesve dhe forcave të rendit.

Komiteti Shqiptar i Helsinkit, mbështet të drejtën për tubim dhe proteste paqësore e të paarmatosur, si një e drejtë e rëndësishme e shtetasve në shoqërinë demokratike.

Ne jemi të mendimit se, në pasojat tragjike që rezultuan në ngjarjen e djeshme, ka ndikuar situata e rëndë politike në vend, e krijuar për shkak të mungesës së dialogut midis forcave politike të pozitës dhe opozitës.

Manifestimi i dhunës nga të dyja palët nuk është në përputhje me të drejtën për tubim e manifestim, ndërsa tejkalimi i forcës së ushtruar nga strukturat e shtetit është sjellje e rëndë për situatën konkrete dhe bie ndesh me mënyrën se si duhet të veprojë një shtet demokratik.

Në mënyrë të veçantë përdorimi i forcës dhe dhunës nga policia mbi qytetarët, pas shpërndarjes së manifestimit, është e pajustifikuar dhe e panevojshme.

Komiteti Shqiptar i Helsinkit e çmon me vend t’u tërheqë vëmendjen këtyre organeve që të ruajnë gjakftohtësinë dhe të mos ndikohen nga retorika politike.

Drejtuesit politikë të të dyja krahëve t’i japin fund gjuhës së urrejtjes, të ndërpresin deklaratat nxitëse dhe prononcimet e parakohshme lidhur me çështje të tilla si hetimi dhe deklarimi i fajtorëve, të cilat nuk janë në kompetencë e tyre, por në kompetencë të një pushteti tjetër të pavarur, atij gjyqësor përfundon deklarata e Komitetit Shqiptar të Helsinkit.

Franca: Kosova, parregullësi në zgjedhje

 


Ambasadori francez në Beograd, Francois Xavier Deniau ka deklaruar se gjatë zgjedhjeve parlamentare në Kosovë ka pasur shumë parregullësi dhe manipulime.

“Në Kosovë ka pasur vjedhje të votave, për të cilat në mënyrë të vecantë kanë raportuar vëzhguesit franceze”, ka pohuar Deniau.

Megjithatë, diplomati ka theksuar se si Franca, ashtu edhe vende të tjera që kanë njohur pavarësinë, janë në dijeni se Kosova është një shtet i ri dhe pa përvojë në demokraci.

Madje, ai ka nënvizuar se pavarësisht parregullësive, procesi i 12 dhjetorit dhe ai i rivotimit më 9 janar patën edhe aspekte pozitive.

“Megjithatë, ka pasur edhe aspekte pozitive si mundësia e mbajtjes së zgjedhjeve, mundësia e kundërshtimit, ekzistenca e organeve për analizimin e ankesave, si dhe mundësia e përsëritjes së zgjedhjeve”, ka shtuar Deniau.

SHBA pushtohen nga i ftohti polar

 

I ftohti polar ka përfshirë Shtetet e Bashkuara të Amerikës, ku temperaturat kanë rënë deri në -40˚C.
Sipas të dhënave nga “National Weather Service”, një qytezë në Minesota (në kufi me Kanadanë) ka arritur temperaturën rekord -43˚C.

Temperatura është regjistruar të premten e kaluar.
 

Tunizi, manifestuesit mblidhen në kryeqytet

 




Disa grupe protestuesish janë mbledhur ditën e sotme në qendër të kryeqytetit tunizian, Tuniz, ku pritet të bashkohen edhe qindra të tjerë nga qytete të tjera të vendit arab.
Ky manifestim quhet nga disa “Marshim në Tuniz”.

Në bulevardin kryesor Bourghiba janë mbledhur qindra persona me flamuj tunizianë në duar, slogane dhe duke kënduar himnin e vendit të tyre.

CEZ, 18 mijë ankesa nga abonentët

 










Privatizimi i OSSH nga një kompani e njohur në tregun energjetik si CEZ nuk solli rezultatet e pritura nga të gjithë, duke pasur parasysh planin e paraqitur për transformimin e shoqërisë të zhytur në korrupsion dhe borxhe. Kur duhen edhe katër muaj nga dyvjetori i privatizimit të OSSH-së, problemet me kompaninë nuk kanë të sosur. Pavarësisht investimit me 60 milionë euro në sistem, krijimit të qendrave të kujdesit ndaj klientit, faturës së re, të detajuar etj, çekët janë duke hasur probleme nga më të ndryshmet, që as vet ata nuk i kishin parashikuar kur blenë Operatorin e Shpërndarjes, ish-degë e KESH-it, për 102 milionë euro.

Drejtues të CEZ thonë për “Shqip” se, çdo muaj paraqiten pranë zyrave rreth 3 mijë ankesa dhe që prej krijimit të zyrave për kujdesin e klientit regjistrohen në total mbi 18 mijë shqetësime të depozituara nga abonentët për probleme të ndryshme. Kryesisht ankohen për faturimin e viteve të kaluara. Në momentin që abonenti kujtohet ose ndërgjegjësohet për të qenë një pagues i rregullt i faturave të dritave, ai has me gjendjen e krijuar ndër vite. Borxhet që duhet të mbledh CEZ Shpërndarje (ish-OSSH) shkojnë në mbi 15 miliardë lekë dhe mbledhja e këtyre shumave është kthyer në sfidë më vete.

“Në të gjithë problematikën që hasim, jo të gjitha mund të zgjidhen njëherësh, brenda një viti. Ne i pranojmë fajet tona, pasi menaxhojmë mbi 1 milion fatura që hidhen në sistem çdo muaj, por problemet në terren janë shumë të mëdha dhe kërkojnë mirëkuptimin e të gjithëve”, - tha për gazetën drejtori i CEZ, Josef Hejsek.

Kompania çeke deklaron se për trajtimin e ankesave nevojiten të paktën 30 ditë kohë, por jo gjithnjë zgjat në këtë afat, pasi përgjigjet mund të jepen edhe brenda në kohë. Për të pasur një kontakt më të drejtpërdrejtë me abonentët dhe për të ofruar zgjidhje dhe shërbime më të shpejta, CEZ parashikon që për vitin 2011, brenda 6-mujorit të parë të hapë edhe 40 qendra të tjera për kujdesin ndaj klientit, kurse sot operon me tre qendra, dy në Tiranë dhe një në Durrës.

Për këtë vit, CEZ parashikon të investojë edhe 35 milionë euro të tjera për modernizimin e sistemit energjetik, që mundëson shtrirjen e të paktën 300 kilometra kabull dhe zëvendësimin e linjave, nga 6 kilovolt në 35 kilovolt, në mënyrë që të mbahet fuqia transportuese e energjisë dhe të mos kemi më mungesë dritash.

Lind Ferrari i parë familjar

 



Katër vende të rehatshme, por e njëjta shpejtësi dhe luks, në Ferrari-n e parë familjar të historisë. Në lajmin e publikuar nga “Corriere della Sera” mësohet se shumë shpejt do të dalë në treg surpriza e re e papritur e markës më të njohur sportive në botë. ”Makina e re me 12 cilindra bashkon ne vetvete, ashtu siç askush nuk ka ditur të bashkojë, karakterin veçanërisht sportiv dhe rendimentin e lartë, një elegancë të rafinuar dhe një rehati të jashtëzakonshme, për të bërë që drejtuesi dhe pasagjerët të përjetojnë emocione unike”, shkruhet në prezantimin e makinës në faqen zyrtare të kompanisë.

Ndryshe nga makinat e zakonshme, pesha e të cilave përqendrohet në pjesën e motorit, falë një teknologjie të veçantë, pesha e Ferrari-t që do të dalë në treg do të jetë e shpërndarë në mënyrë pothuajse të barabartë në të gjithë pjesët e trupit.

Makina ka një motor prej 6 200 centimetrash kubikë, 660 kuaj fuqi dhe mund të arrijë deri në 8 mijë xhiro në minutë. Ajo është në gjendje që të kapë shpejtësinë e 100 km/h brenda 3,7 sekondave nga nisja.

Big Brother, ikin Elisa dhe Emiljo

 


Dy persona u larguan me vendim të publikut nga shtëpia e “Big Brother” mbrëmjen e së shtunës. Elisa pas votimit gjatë javës dhe Emiljo pasi u hap zarfi i zi që përmbante vendimin e “Big Brother” për të kandiduar tre persona.

Ai që do të largohej u votua gjatë mbrëmjes. Emiljo shkoi në kandidim pasi u votua nga Ermela. Por, vendimin për të larguar pikërisht atë nuk e priti mirë Algeni, i cili për një moment u duk se do të linte lojën.

Është larguar nga loja gjatë javës që kaloi edhe Fatoni sepse humbi babain e tij.

Personat e kandiduar, në rrezik eliminimi, janë: Ermela, Ervini dhe Algeni.

Lajmi i mirë për banorët ishte fitimi i provës së javës, ndërsa për Ogrenin në veçanti shpallja si lider i javës pas fitores në provën e rezistencës përpara së cilës i kishte vendosur “Vëllai i Madh”. Kjo bëri që ai të ishte imun ndaj kandidimeve, por edhe të fitonte të drejën e kalimit të një mbrëmjeje romantike në dhomën e liderit ku iu dha mundësia të ftonte menjëherë një person dhe një tjetër që do të mund ta zgjedhë gjatë javës.

E ftuara e së shtunës ishte pa dyshim Neda.

Emanuelson, zyrtarisht i Milan-it

 









Mbrojtësi i majtë i kombëtares holandeze dhe Ajax-it, Urby Emanuelson, është shndërruar zyrtarisht në futbollistin e ri të Milan-it.

Megjithatë, mbetet për të parë nëse transferimi do të ndodhë që tani, apo kur kontrata e tij me Ajax-in të skadojë në verë. Lajmin e konfirmoi vetë administratori i deleguar i klubit, Adriano Galliani:

”Është e sigurt që Emanuelson do të jetë një futbollist i Milan-it. Kemi rënë dakord me të që të jetë klubi ynë ai ku futbollisti do të vazhdojë karrierën. Megjithatë, po bisedojmë që të bëjmë të mundur transferimin që në këto ditë”.

Policia i hap luftë Prokurorisë

 









Prokuroria e Përgjithshme pret flet-arrestet për 6 oficerë madhorë të Gardës së Republikës me akuzën e vrasjes, shpërdorimit të detyrës dhe tejkalimit të kompetencave me pasojë vrasjen e tre personave, fletë-arreste që i janë dorëzuar që në mëngjes Policisë së Shtetit.

Por edhe pse ka kaluar gjithë kjo kohë, policia nuk ka ekzekutuar asnjërin prej këtyre urdhër-arresteve dhe të 6 oficerët e gardës janë ende të lirë.

Duket se mes Prokurorisë dhe Policisë po zhvillohet një luftë e heshtur për këtë çështje, ndoshta me sfond politik.

Policia ka refuzuar të zbatojë urdhërarrestet, duke ngjallur reagim edhe në zyrat e Prokurorisë që po heton ngjarjet e 21 janarit.

Në kohën që Prokuroria e Tiranës gjatë gjithë së shtunës ka qendruar në pritje për arrestimin e gjashtë gardistëve të dyshuar për vrasje, shpërdorim detyre dhe tejkalim kompetencash me pasojë vdekjen e tre personave, burime të Policisë së Tiranes nga sektori kundër krimeve ndaj jetës bënë me dije për TCH se policia ka përqendruar vëmendjen dhe është duke u kërkuar pa vënë në dijeni Prokurorinë tek një person tjetër nga turma për llogari të hetimeve, pasi dyshon atë individ nga turma për vrasje.

I pyetur nga TCH se përse nuk po zbatohen urdhër-arrestet e Prokurorisë, drejtori i përgjithshëm i Policisë së Shtetit tha vetëm me një fjali se do të zbatohet ligji, por me gjithë garancinë nuk dihet ende nëse zbatimi i ligjit përfshin edhe fletë-arrestet e Prokurorisë apo vetëm hetimet paralele të Policisë së Shtetit.

Ndërkohë që nuk janë zbatuar ende urdhër-arrestet e Policisë së Shtetit për gardistët e vënë nën akuzë, Policia e Tiranës njoftoi arrestimin e një pjesëmarrësi në proteste për armëmbajtje pa leje.

Kjo pasi të gjashtë gardistës për të cilët Prokuoria e Tiranës ka dërguar emrat konkrete të tyre dhe vendshërbimin ku ata ndodheshin gjatë protestës janë shumë mirë të identifikueshëm për policinë dhe sigurisht edhe lehtësisht me adresa të deklaruara.

E ndërsa Prokuroria shprehet se ka një refuzim për bashkëpunim nga ana e Policisë së Shtetit për arrestimet, ky veprim i Policisë së Shtetit, nëse është e vërtetë do të hapë një preçedent të rrezikshëm dhe të pandodhur më parë në marrëdhëniet mes të dy institucioneve.

Urdhër-ndalimet janë bërë për drejtues të nivelit të lartë të Gardës të cilët kanë qenë shefa të shërbimit gjatë demonstratës dhe oficerë zbatues.

Në vijim të sekretit hetimor Prokuroria nuk jep emra në mënyrë që të ndihmojë Policinë për të mos sabotojë operacionin për prangosjen e gardistëve të dyshuar për vrasjet.

Sipas ligjit të Gardës, ndaj një protestuesi mund të qëllohet vetëm nëse ai kalon rrethimin e një institucioni të veçantë dhe qëllohet vetëm, atëherë kur është paralajmëruar.

Siç është dëshmuar deri tani të paktën nga pamjet filmike, por dhe provat e mbledhura nga hetuesit, të tre viktimat janë qëlluar me armë zjarri, jo brenda oborrit, por jashtë perimetrit të Kryeministrisë.

Nuk dihet ende se përse nuk ka një reagim zyrtar qoftë nga organi qendror i akuzës qoftë nga Policia e Shtetit.

Foto nga protesta